Алматыда Қытай Халық Республикасының Мемлекеттік сыйлығының лауреаты Жазушы Жақсылық Сәмитұлының 7 томдық жинағы таныстырылды.
Жинақтың әр томында қаламгердің шығармалары ыждахаттылықпен топтастырылып, Қытайда, туған топырағы Қазақстанда жазылған, оқырман мен сыншы қауымының көңілінен шыққан әңгіме, повестері мен романдары енген.
7 томдыққа 1940 жылдары Алтайдағы ұлт-азаттық көтерілісінің тарихи себебі, сипаты, орын алған түрлі оқиғалар арқау болған «Қаһарлы Алтай» тарихи трилогиясы, өмірінің соңғы жылдары жазылған көркем шығармалары, ғылыми танымдық негізде жазылған ҚХР-дағы қазақтардың тарихы, тағдыры, рухани-әлеуметтік өмірі қамтылған «Қытайдағы қазақтар» монографиясы және басқа да көптеген көркем дүниелері жарық көрген.
Еске алу жиынында жазушының ұлт руханиятына сіңірген еңбегі ерекше аталып, Мемлекеттік кеңесші Ерлан Қариннің арнайы құттықтау хатын Алматы қаласы Мәдениет басқармасының басшысы Ғани Майлыбаев жазушының отбасына салтанатты түрде табыстады.
Қытайда жүргізілген «Мәдени төңкеріс» жылдары «ұлтшыл» деген жаламен қудаланған күрескер жазушы Жақсылық Сәмитұлы 1959-1979 жылдары Үрімжі, Тарым және басқа да еңбекпен түзеу лагерьлерінде азапты күндерді өткізген. Бірақ рухы сынбаған, жүрегі елім деп соққан қаламгер сол жылдардан кейін де қаламын қолына алып, жаңа туындыларымен әдебиет қоржынын толықтырды.
