Алматыдағы Ұлттық кітапханада көрнекті жазушы, ҚР еңбек сіңірген қайраткері, «Құрмет», «Парасат», «Барыс» ордендерінің иегері Мархабат Байғұттың 80 жылдығына арналған «Арайлы Алматыға шырайлы Шымқаладан» атты әдеби керуен өтті.
Іс-шараны Ұлттық кітапхана, Шымкент қаласының мәдениет, тілдерді дамыту және архивтер басқармасы және Әл-Фараби атындағы қалалық ғылыми-әмбебап кітапханасы бірлесіп ұйымдастырды. Әдеби басқосу жазушының шығармашылығынан сыр шертетін бейнеролик, кеңейтілген кітап көрмесі және жастардың әдеби композицияларымен жалғасты. Шара барысында қаламгердің рухани әлемі мен ұлттық әдебиетке қосқан үлесі тереңінен талданып, оның адамгершілік пен парасаттылыққа үндейтін туындылары кеңінен насихатталды.
Кешке зиялы қауым өкілдері, белгілі қаламгерлер мен әдебиет жанашырлары қатысып, естеліктерімен бөлісті. Ерекше атап өтерлігі – жазушының жары, өмірдегі жан жолдасы да әдеби жиынға қатысып, жүрекжарды әсерлі лебізін білдірді.
