Дәстүрлі Mecenat.kz әдеби байқауының биылғы (4-маусымы) жүлдесін жазушы Әлихан Жақсылық жеңіп алды. Ол додаға «Тургенев көшесіндегі үй жұмысқа қабылдайды» атты романымен қатысқан еді. Байқау төртінші рет өткізілді. Оған қатысуға 21 қолжазба берілді, оның 9-ы қазақ тілінде, 12-сі орыс тілінде болды.
Жеңімпазды таңдау mecenat.kz. сайтында қорғалған халықтық дауыс беруі арқылы жүзеге асырылды. Осы маусымда 1738 дауыс қабылданды. Үздік деп танылған Дидар Амантайдың «Махаббат жыры (Ғашықтар)», Әлихан Жақсылықтың «Тургенов көшесіндегі үй жұмысқа қабылдайды», Есенғали Садырбаевтың «Повелитель хищных птиц», Жағыпар Егізбаевтың «Күздің 14 сәті», Нұрайна Сәтбаеваның «Мухит идет за светом», Сейітжан Спановтың «Свадьба младшего брата» романдары ақтық сынға шықты.
Жазушыға «Freedom Finance Life» өмірді сақтандыру компаниясының 500 доллар көлемінде өмір бойы ай сайынғы ерікті аннуитеттік сақтандыру полисі табыс етілді. Жобаның меценаты – белгілі қазақстандық кәсіпкер әрі филантроп, «Freedom Holding Corp.» компаниясының бас атқарушы директоры Тимур Турлов.
Жобаның негізін қалаушы – Ерлан Асқарбеков.
2022 жылы бұл марапатты «Күлпет» романымен Шархан Қазығұл, 2023 жылы «Өлгендер қайтып келеді» романымен Тұрысбек Сәукетаев, 2024 жылы «Өмір бәйтерегі» романымен Сәуле Досжан иеленген болатын.
