Мемлекет және қоғам қайраткері, көрнекті қаламгер Әбіш Кекілбаевтың жеке мұрағаты Президент Архивіне тапсырылды. Салтанатты шарада жазушының отбасы мүшелері, мемлекет және қоғам қайраткерлері құттықтау лебіздерін білдіріп, Әбіш Кекілбайұлының рухани-мәдени мұрасының ел тарихындағы орнын атап өтті.
Құжаттарды тапсыру туралы келісімшартқа қол қойылып, көпшілік назарына жазушының құнды құжаттары, жеке хаттары, Парламент пен Үкіметтегі баяндамалары, сирек фотосуреттері, жеке заттары мен тарихи бейнежазбалары ұсынылды. Жалпы, архивке 22 мыңнан астам парақтан тұратын 300-ден астам құжат жинағы берілді.
«Осы құжаттарды реттеу және рәсімдеу жұмыстары 2 жылдан астам уақыт алды. Тәуелсіздік алған кезде жазылған, сөйлеген сөздері мен баспада басылған мақалалардың түпнұсқалары да осы жерде сақтаулы. Атамыздың 99-жылдан бастап әлі көз көрмеген, ешқайда жарияланбаған өлең кітаптарын тапқанбыз. Ол өлең кітабы былтыр 85 жылдығына табысталған», дейді жазушының немересі Абыл Кекілбаев.
Архивтік құжаттарды тапсыру жөніндегі ресми келісімшартқа жазушының немересі Абыл Кекілбаев пен Президент Архивінің директоры Әлия Мұстафина қол қойды.
Президент Архивіне тапсырылған 22 мыңнан астам парақ және 308 сақтау бірлігінен тұратын мұрағатта жазушының көркем туындыларының түпнұсқалары, жеке қолжазбалары, саяси баяндамалары, ресми қызмет кезіндегі жазбалары, тіпті іссапарлық естеліктеріне дейін түгел қамтылған. Көпшілік біле бермейтін бір ерекшелік – Әбіш Кекілбайұлы барлық еңбегін қолмен жазған.
Президент Архиві бүгінде 1,5 миллионнан астам сақтау бірлігін қамтиды. Оның ішінде ғылым, мәдениет, саясат саласында елге еңбегі сіңген тұлғалардың жеке қорлары бар. Енді сол тізімге Әбіш Кекілбайұлының архиві де қосылды.
«Әбіш Кекілбайұлы – терең ойлы, мемлекетпен елге адал қызмет еткен қайраткер. Ол Жоғарғы Кеңестің төрағасы, Мемлекеттік хатшы сияқты!жауапты қызметтерде болып, тәуелсіз елдің даму бағытына үлкен үлес қосты. Оның жеке архиві – егемен Қазақстанның қалыптасу кезеңіндегі саяси шешімдер мен тарихи оқиғаларды терең зерделеуге мүмкіндік беретін құнды дереккөз», деді Президент Архивінің директоры Әлия Мұстафина.
