Германияның Франкфурт қаласында өтіп жатқан дәстүрлі халықаралық кітап көрмесінде ақын, журналист Дүйсенәлі Әлімақынның «Америка ашқан қазақтар» атты жаңа кітабының таныстырылымы өтті. Аталған іс-шараны неміс жазушысы Артур Вайнганд жүргізді.
Шараға АҚШ, Қазақстан, Германия, Украина және Түркия елдерінен келген оқырмандар, әдебиетсүйер қауым мен мәдениет өкілдері қатысты. Іс-шара барысында автор жаңа еңбегінің жазылу тарихымен, шығармашылық ізденістерімен және шетелдегі қазақтардың өмірі мен тағдырына қатысты ой-пікірлерімен бөлісті.
Таныстырылым соңында қатысушылар кітап авторына сұрақтар қойып, туындының мазмұнына жоғары баға берді.
«Франкфурт қаласында өтіп жатқан дәстүрлі халықаралық кітап көрмесіне қатысу мен үшін үлкен қуаныш әрі зор жауапкершілік болды. Осы беделді алаңда менің жаңа еңбегім – «Америка ашқан қазақтар» атты кітабымның таныстырылымы өтті. Қазақтың болмысын, тілін, тарихын әлемдік әдеби кеңістікке шығару – біздің бәрімізге ортақ міндет деп білемін. Таныстырылым соңында оқырмандармен сұхбаттасып, олардың жылы ықыласын сезіндім. Бұл кездесу мен үшін шығармашылық жолдағы маңызды белес болды. Франкфурттағы осы таныстырылым қазақ қаламгерлерінің халықаралық деңгейде танылуына және ұлттық әдебиетіміздің кең өріс алуына үлес қосады деп сенемін. Іс-шараны ұйымдастыруға ұйытқы болған Мәдениет министрлігіне，Архив，құжаттама және кітап ісі комитетіне，Кітап палатасына және осында шығарған кітаптарын әкеліп，әлемдік баспагерлерге көрсетке әрбір баспаға алғысым шексіз», дейді автор.
Айта кетейік, автор бұл еңбекті «Болашақ» бағдарламасы аясында Вашингтон университетінде тәжірибеден өту кезінде жазып шыққан. Кітапқа АҚШ кітапханаларында сақталған қазаққа қатысты деректер енген.
